Mani Matter Farbfoto Songtext

Uf dere Farbfoto gseht men e Gutsche wo fahrt amne Abe am Meer

Drin sitzt es bildhübsches Mannequin, dernäbe, der Arm um ihns gschlungen e Heer.

D'Stärne schyne vom tiefblaue Himmel drufabe, und undedra steit

Ds Glück sigi das und es Glas vomne Liqueur, i weiss nümme wie men ihm seit.

I bi bis jitz nume sälte am Aben i Gutsche ga fahre am Meer

Bi mit kem Mannequin befründet und Liqueur, das schetzen i nid eso sehr

Aber sitdäm i die Foto ha gseh, und ha gläse was undedra steit

Weiss i was mir i mim truurige Läbe doch eigentlech alles entgeit.

Mietet drum Dir wo mit Mannequins bekannt sit, e Gutschen am Beste no hüt

Fahret a ds Meer wen es Abe wird, nähmet dä Liqueur und ds Liqueurglas mit

Denn üses mönschleche Läbe uf Ärde, das müesst Dir doch zuegäh, isch mies

Und we me weiss wo me ds Glück cha ga finge, de fragt me doch nid nach em Pris.